مع دخول الشتاء هتلاقي عندك بلوفرات كتير بتاعتك أو بتاعة أولادك، محتارة فيها ومش عارفة تتخلصي منها إزاي أو تعملي بيها إيه، لأن مقاساتها بقت مش مناسبة أو موضتها بقت قديمة أو فيها أي مشكلة، زي قَطع أو لون باهت.
علشان كده دلوقتي هنقول لك على 5 أفكار بسيطة ومبتكرة تستخدمي بيها البلوفر القديم..
ممكن تعملي قواعد للكوبايات والفناجين
1- قواعد للكوبايات (كوستر)
بخطوات بسيطة ممكن تعملي من البلوفر الصوف القديم، قواعد للكوبايات وفناجين الشاي أو القهوة، هيكون مفيد في استخدامك اليومي، وتقدري كمان تطلّعيه للضيوف.
افردي البلوفر على سطح مستوي، وهاتي كوباية أو أي حاجة مدورة، واستخدمي ماركر أو قلم رصاص علشان تحدّدي مكان الكوباية على البلوفر، اعملي 6 دواير أو 8 حسب عدد القواعد اللي إنتي محتاجاها، وبعد كده قصّي مكان العلامات.
بلون خيط مميز اعملي غرز واسعة على حروف الدواير دي علشان تمسك الخيط ومايفكّش منك، بعدها تقدري تستخدمي قواعد الكوبايات الجديدة.
ممكن تعملي أكياس للمخدات
2- أكياس للمخدات
خدي مقاسات المخدات اللي عندك، ممكن تكون مخدات أوضة المعيشة أو مخدات أوضة النوم، وافردي البلوفر على سطح مستوي، وقصّي على مقاس المخدات.
بعد كده خيطيها على ضهرها من 3 جوانب، وممكن تعملي الجنب الرابع بسوستة عادية أو بشرايط، وممكن كمان تخيّطيه بغرز ألوانها مناسبة للقماش.
ممكن تعملي كوفر للشماعات
3- شماعات أنيقة
استخدمي البلوفرات القديمة في إنك تعملي كوفر للشماعات القديمة اللي عندك، واستخدميها مع ملابسك الناعمة والخفيفة واللي بتكون عُرضة للنتش أو القَطع لو اتشبكت في أي حاجة حادة.
قصي من البلوفر قطع على مقاس الشماعة وغلّفي الشماعة بالقماش، وبعد كده خيّطي أطرافه بأي خيط عندك، شكل الشماعة هيبقى جديد جدا ومبهج، وهتحافظ على هدومك، وكمان كل ما تفتحي الدولاب هتتبسطي لما تشوفيها.
ممكن تعملي محفظة للفلوس
4- جراب للموبايل أو محفظة فلوس
ممكن تقصّي البلوفر على مقاس الموبايل بتاعك، وتخيطيه من 3 جوانب.
بعد كده ممكن تقفّلي الجانب الرابع بشريط ستان ملون أو كبسونة أو سوستة صغيرة.
وممكن تعملي كمان بنفس الطريقة محفظة فلوس صغيرة للخروجات السريعة على المقاس اللي يناسبك.
ممكن تعملي بطانية للبيبي
5- بطانية
ممكن تعملي بطانية للبيبي من البلوفر القديم، والفكرة دي هتكون مفيدة أكتر لو كان مقاس البلوفر كبير أو واسع، في البداية قصي أكمام البلوفر ورقبته بحيث تبقى أطرافه مستقيمة، بعد كده قصيه من جنب واحد علشان مساحته تبقى مفرودة، بعد كده اثني أطرافه بتطبيقة رفيعة أوي وخيّطيها خياطة يدوية رقيقة بلون مناسب.
كمان تقدري تستخدمي أكتر من بلوفر بنفس الخطوات اللي فاتت وتخيطيهم مع بعض علشان تحصلي على بطانية كبيرة على شكل مستطيلات موصولة ببعضها، ممكن تستخدميها في إنك تتدفي بيها على الكنبة قدام التليفزيون أو وإنتي قاعدة تقري.
بعض ما تصفحت
اولادي حياتي
