نسيم الصباح
عضو جديد
وأنـا أشوفـه فـي نواظـرك بايـن
حزنَ تدسّـه تكشفـه نظـرة العيـن
يبين لـي مـن يـوم عينـك تعايـن
عينك صدوقه .. لو كذب وجهك الزين
لو قال حالـك زيـن ماهـوب زايـن
ومنين جاك الحـزن يالفاتـن منيـن
فضفـض وفتّـح مغلقـات الخزايـن
قلّي وأنا خلّك علـى العسـر والليـن
فالحـب .. مابينـي وبينـك تبايـن
وأنا لك إليا نالك مـن الزمـن شيـن
مادمـت أمانـه.. للأمانـات صايـن
إن كان صدرك ضاق من طولة البين
البعـد فالأنفـس مهـو فالمـدايـن
حنـا ترانـا لـو بعدنـا قريبـيـن
أقرب من الماطـر لخضـر الجنايـن
مادام عشرتنـا مـن سنيـن ودنيـن
حـبً تشربنـاه مـاهـوب هـايـن
أقرب وفـل حجاجـك وربـك يعيـن
والهـم ماخـلا بهالكـون .. كايـن
قبلك همومـي شبّـت بخافقـي ليـن
شفت المواجع فـي فـؤادي طبايـن
أبحـرت فالدنيـا وذقـت الأمـريـن
هما الرياح تسيـر عكـس السفايـن
تجرفني الأمواج مدري علـى ويـن
ماهملتنـي غيـر والحـال شـايـن
وذكرت حزني منك في نظـرة العيـن
